Rótin sendi eftirfarandi erindi til Barnaverndarstofu 30. júní 2015:
„Rótin er félag um málefni kvenna með áfengis- og fíknivanda. Markmið félagsins eru einkum að stofna til umræðu um konur, fíkn, áföll og ofbeldi en félagið vill að komið verði á samstarfi á milli stofnana, samtaka og annarra fagaðila sem fást við vímuefnameðferð, ofbeldi og úrvinnslu áfalla. Félagið beitir sér fyrir öflun upplýsinga og úrvinnslu fyrirliggjandi gagna og hefur í þeim tilgangi m.a. sent erindi til Umboðsmanns barna, Landlæknis (sjá Skráning atvika og önnur gæðamál í meðferðarstarfi, erindi vegna náms áfengis- og vímuefnaráðgjafa, opið bréf til landlæknis vegna öryggis kvenna í meðferð (einnig sent á velferðar-ráðherra), Velferðarráðuneytis (erindi vegna skimunar á ofbeldi)og Úrskurðarnefndar um upplýsingarmál (erindið er send vegna óánægju með svör Embættis landlæknis um gæðamál). Einnig höfum sent inn athugasemdir við frumvörp og þingsályktunartillögur og bendum sérstaklega á tillögur okkar og athugasemdir við tillögur starfshóps um áfengis- og vímuvarnir sem við athendum í janúar 2015.
Ráð Rótarinnar hefur heimsótt ýmsar stofnanir í þeim tilgangi að kynna starfsemi félagsins og efna til umræðna um málefni er varða konur, börn og ungmenni með áfengis- og fíknivanda. Meðal annars höfum við átt fundi með starfsmönnum Barnaverndar Reykjavíkur og Umboðsmanni barna.
Þó að Rótin fjalli einkum um málefni kvenna með áfengis- og fíknivanda deilir hún áhyggjum fjölmargra um stöðu barna sem glíma við þennan vanda og hefur til dæmis lýst yfir efasemdum um að hafa eigi börn í meðferð á Vogi þar sem mikill samgangur er við fullorðna sem eru þar í meðferð. Í þessu sambandi er rétt að benda á að í lögum nr. 74 frá árinu 1997 um réttindi sjúklinga segir í 27. gr. að umhverfi og aðbúnaður sjúkra barna á heilbrigðisstofnunum skuli hæfa aldri þeirra, þroska og ástandi.
Þá er einnig ljóst að eftirliti með meðferðarstofnunum er ábótavant eins og draga má ályktun af í nýlegum dómi Hæstaréttar í meiðyrðamáli Týs Þórarinssonar gegn Braga Guðbrandssyni.
Rótin óskar eftir svörum hjá Barnaverndarstofu við eftirfarandi spurningum:
- Hver er meðferðarstefnan á heimilum Barnaverndar t.d. varðandi fíknivanda?
- Er áfallasaga barnanna skoðuð og veitt meðferð í samræmi við það?
- Hvaða rök lágu að baki því að samið við fyrirtæki eins og Götusmiðjuna sem ekki hafði faglega forystu eftir Byrgismálið kom upp?
- Hefur vinnureglum varðandi aðkeypta meðferð barna verið breytt eftir að vandamál með Götusmiðjuna urðu ljós?
- Hvernig er samstarfi Barnaverndarstofu og SÁÁ háttað?
Einnig óskar ráð Rótarinnar eftir að eiga fund með starfsfólki Barnaverndarstofu.“
Erindið má sjá hér í PDF-skjali.
Svar barst við erindinu 13. október 2015 og má lesa það hér í PDF-skjali.
